ဥက္ကဋ္ဌ၏ ဥယျောဇဉ်

ကျွန်တော်တို့ရဲ့ ကမ္ဘာ့ရတနာဘဏ်ကို ၁၅ ဖေဖော်ဝါရီ ၁၉၉၆ မှာ မြန်မာ့မွေးမြူရေးနှင့် ရေလုပ်ငန်း ဖွံ့ဖြိုးရေးဘဏ် အမည်ဖြင့် စတင်တည်ထောင်ခဲ့ပြီး ၁ ဇူလိုင် ၂၀၁၃ မှစ၍ ကမ္ဘာ့ရတနာဘဏ်လီမိတက် (အများနှင့်သက်ဆိုင်သောကုမ္ပဏီလီမိတက်) အမည်သို့ ပြောင်းလဲပြင်ဆင်သတ်မှတ်ခဲ့ရာ ၁၅ ဖေဖော်ဝါရီ ၂၀၂၆ တွင် နှစ် (၃၀) ပုလဲရတုသို့တိုင် အောင်မြင်စွာရောက်ရှိ နိုင်တော့မည်ဖြစ်ပါသည်။ လက်ရှိတွင် ဘဏ်ခွဲ (၁၇၀) ဘဏ်၊ ဘဏ်ခွဲငယ် (၇) ဘဏ် စုစုပေါင်းဘဏ်ခွဲ (၁၇၇) ဘဏ်အထိ ဖွင့်လှစ်ထားသော်လည်း လက်ရှိဖြစ်ပေါ်နေသော နယ်မြေဒေသလုံခြုံရေးအရ ဘဏ်ခွဲပေါင်း (၃၄) ဘဏ်အား ခေတ္တပိတ်ထားရပါသဖြင့် (၁၄၃) ဘဏ်ဖြင့် ဘဏ်နှင့်ဆက်သွယ်‌ဆောင်ရွက်ကြသည့် အများပြည်သူတို့၏ ငွေကြေးဝန်ဆောင်မှုလုပ်ငန်းများအား အဆင်ပြေချောမွေ့စွာ ဆောင်ရွက်နိုင်ရန် ဖြည့်ဆည်းဆောင်ရွက် ပေးလျက်ရှိပါသည်။

လေးစားတန်ဖိုးထားရပါသော ဂုဏ်သရေရှိ အစုရှယ်ယာရှင်များနှင့် မိတ်ဆွေသင်္ဂဟအပေါင်း ဘဏ်နှစ်ပတ်လည်အခါသမယမှာ ကိုယ်စိတ်နှစ်ဖြာ ကျန်းမာချမ်းသာပြီး မင်္ဂလာအပေါင်းနှင့်ပြည့်စုံကြပါစေကြောင်း ဆုတောင်းမေတ္တာပို့သအပ်ပါသည်။ သဘာဝဘေးအန္တရာယ်တစ်ခုဖြစ်သည့် ၂၈ မတ် ၂၀၂၅ က အင်အားပြင်းထန်စွာ လှုပ်ခတ်ခဲ့သော မန္တလေးငလျင်ကြီးကြောင့် ပြည်ထောင်စုနယ်မြေ နေပြည်တော်၊ မန္တလေးတိုင်းနှင့် စစ်ကိုင်းတိုင်းရှိ ဘဏ်ခွဲ အချို့တွင် အဆောက်အဦနံရံများ အက်ကွဲခြင်း၊ မျက်နှာကြက်များ ပြိုကျခြင်းများ ဖြစ်ပေါ်ခဲ့ရပါသည်။ အဆိုပါ ပျက်စီးမှုများရှိခဲ့သော်လည်း ဘဏ်ဝန်ထမ်းများနှင့် Customer များ ထိခိုက်သေဆုံးမှုမရှိခဲ့ပါ။ အဆိုပါ ငလျင်အန္တရာယ်များ ဖြစ်ပေါ်နေသည့်ကြားမှပင် ဘဏ်၏ Customer များကို အခက်အခဲမရှိ ငွေကြေး ဝန်ဆောင်မှုများ ဆောင်ရွက်နိုင်ရန်အတွက် ဘဏ်၏ ပရဝဏ်ပြင်ပနေရာတွင် ယာယီအဆောက်အအုံများ တည်ဆောက်လျက် ဝန်ထမ်းများမှ စိတ်ရော ကိုယ်ပါကြိုးကြိုးစားစား ဝန်ဆောင်မှုများ ဆောင်ရွက်ပေးနိုင်ခဲ့ သည့်အပြင် Data Center နှင့် Disaster Recovery များမှာလည်း ပျက်စီးခြင်းမရှိ၍ လုပ်ငန်းများ အရှိန်အဟုန်မပျက် ဆောင်ရွက်နိုင်ခဲ့ပါသည်။

ကမ္ဘာ့ရတနာဘဏ်သည် မြန်မာနိုင်ငံတော်ဗဟိုဘဏ်၏ Authorized Dealer Licence ခွင့်ပြုချက်ဖြင့် နိုင်ငံခြားဘဏ်လုပ်ငန်းများ ဆောင်ရွက်လျက်ရှိရာ Money Changer Counter များဖွင့်လှစ်၍ USD, EURO, SGD, THAI BAHT, MYR များ ရောင်းချပေးလျက်ရှိပါသည်။ ထို့ပြင် Correspondent Bank (၅) ခုတွင် Nostro Account များဖွင့်လှစ်၍လည်းကောင်း၊ နိုင်ငံခြားဘဏ် (၄)ခုတွင် အဆက်အသွယ်ဘဏ် RMA တည်ဆောက်၍ လည်းကောင်း၊ Export/ Import Services ၊ Bank Guarantee လုပ်ငန်း၊ Trade Finance လုပ်ငန်းများ ဆောင်ရွက်လျက်ရှိသည့်အပြင် International Money Transfer လုပ်ငန်းများအား Western Union နှင့် ချိတ်ဆက်၍ နိုင်ငံပေါင်း (၂၀၀) ကျော်သို့ အပြည်ပြည်ဆိုင်ရာ ငွေလွှဲလုပ်ငန်းများကို စဉ်ဆက်မပြတ် ဆောင်ရွက်ပေးလျက်ရှိသည်။
ကမ္ဘာ့ရတနာဘဏ်၏ GTB UnionPay Single Brand Credit Card များကို In-House ထုတ်ပေးနိုင် ခဲ့ခြင်းကြောင့် Hotel, Supermarket များတွင် POS ငွေပေးချေမှုများ၊ Online ငွေပေးချေမှုများ အဆင်ပြေ‌ ချောမွေ့စွာ ဆောင်ရွက်နိုင်ခဲ့သည့်အပြင် Internet Banking/ Mobile Banking စသည့် ဘဏ်လုပ်ငန်း ဝန်ဆောင်မှုများကို (24/7) ဆောင်ရွက်ပေးနိုင်ပြီဖြစ်ပါသည်။
၂၀၂၄-၂၀၂၅ ဘဏ္ဍာနှစ်အတွင်း ကမ္ဘာ့ရတနာဘဏ်၏ Product အသစ်ဖြစ်သော GTB Mobile Wallet ဖြစ်သော GTB Pay, GTB Agent, GTB Merchant များဖြင့် Digital Banking ဝန်ဆောင်မှုများကို တိုးချဲ့ ဆောင်ရွက်နိုင်ခဲ့ခြင်းကြောင့် GTB Pay Accoint အချင်းချင်းငွေလွှဲခြင်း၊ GTB Pay, GTB Agent နှင့် ဘဏ်စာရင်းများချိတ်ဆက်ခြင်း၊ အခြားဘဏ်များ၏ MPU Card မှ Wallet Cash In ဆောင်ရွက်ခြင်း၊ GTB Agent များတွင် Wallet Cash In/ Cash Out ဆောင်ရွက်ခြင်း၊ ဖုန်းဘေလ်ဖြည့်သွင်းခြင်း၊ Bill Payment ပေးချေခြင်း ဆောင်ရွက်နိုင်ခဲ့ပြီဖြစ်သည့်အပြင် GTB Pay ဖြင့် Denko ဆီဆိုင်များတွင် ငွေပေးချေခြင်းကို လက်ခံနိုင်သည့် Merchant Acquiring လုပ်ငန်းများကိုပါ တိုးချဲ့ဆောင်ရွက်နိုင်ခဲ့ပါသည်။
လျှပ်စစ်မီတာဘေလ်များကို နိုင်ငံတစ်ဝန်း နေရာဒေသမရွေး ပေးဆောင်နိုင်ရေး ဆက်လက်ကြိုးပမ်း ဆောင်ရွက်ခဲ့ရာ ပြည်ထောင်စုနယ်မြေ နေပြည်တော်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး တို့အပြင် မကွေးတိုင်းဒေသကြီး၊ ဧရာဝတီတိုင်းဒေသကြီး၊ ပဲခူးတိုင်းဒေသကြီး (အရှေ့/အနောက်)၊ မွန်ပြည်နယ်တို့တွင် GTB Pay ဖြင့် အလွယ်တကူ ပေးဆောင်နိုင်ခဲ့ပြီဖြစ်ပါသည်။ ဆက်လက်၍ မြန်မာနိုင်ငံတော်ဗဟိုဘဏ်၏ ခွင့်ပြုချက်အရ MyanmarPay (MMQR) သို့ ဝင်ရောက် အကောင်အထည်ဖော် နိုင်ရန်အတွက် Software, Hardware နှင့် လိုအပ်သည်များ ဆောင်ရွက်လျက်ရှိပါသည်။
Compliance Department မှလည်း AML/CFT ဆိုင်ရာ မူဝါဒလုပ်ထုံးလုပ်နည်းများအား ဝန်ထမ်းများ သိရှိနားလည်စေရန် ဗဟိုဘဏ်၏လမ်းညွှန်ချက်နှင့်အညီ ငွေကြေးခဝါချမှုတိုက်ဖျက်ရေးနှင့် အကြမ်းဖက်မှုကို ငွေကြေးထောက်ပံ့ခြင်း တိုက်ဖျက်ရေးဆိုင်ရာမူဝါဒနှင့် လုပ်ထုံးလုပ်နည်းများကို သိရှိလိုက်နာနိုင်စေရန် လက်စွဲစာအုပ်နှင့် အိတ်ဆောင်စာစောင်များ ဖြန့်ဝေပေးခဲ့သည့်အပြင် AML/CFT ဆိုင်ရာ အသိပညာမြှင့်တင် ရေး Zoom-Meeting စနစ်ဖြင့် ဌာနများနှင့် ဘဏ်ခွဲများသို့ သင်တန်းပို့ချဆွေးနွေးခြင်းကိုလည်း ဆောင်ရွက် နေပြီဖြစ်ပါသည်။
ကမ္ဘာလုံးဆိုင်ရာ ကပ်ရောဂါဖြစ်သော COVID-19 ရောဂါကို ကာကွယ်နိုင်ရန် ဘဏ်ဝန်ထမ်းများအား ကာကွယ်ဆေးအခမဲ့ထိုးနိုင်ရေး စီစဉ်ဆောင်ရွက်ပြီး ဝန်ထမ်းများမှ ထိုးနှံလျက်ရှိပါသည်။
ကမ္ဘာ့ရတနာဘဏ်အနေဖြင့် CSR လုပ်ငန်းရပ်များကို ဆောင်ရွက်နိုင်ရန်အတွက် ရတနာနှလုံးသား လူမှုအကျိုးပြုအဖွဲ့က ၂၀၂၄-၂၀၂၅ ဘဏ္ဍာနှစ်အတွင်း ရေဘေးဒုက္ခ၊ ငလျင်ဘေးဒုက္ခ ကြုံတွေ့ခဲ့ရသော ဒေသများသို့ အလှူငွေနှင့် စားသောက်ဖွယ်ရာများ ပေးပို့လှူဒါန်းခြင်း၊ ဆင်းရဲနွမ်းပါးလူနာများကို ဆေးကုသ စရိတ်ထောက်ပံ့ခြင်း၊ ပရဟိတလုပ်ငန်းများ၊ သာသနာရေးဆိုင်ရာ ကိစ္စရပ်များအတွက် ကျပ် (၁၇၀.၈) သန်းကို လှူဒါန်းခဲ့ပြီး အစီရင်ခံကာလအထိ ငွေကျပ် (၁,၀၀၉.၂) သန်းကျော် လှူဒါန်းခဲ့ပါသည်။
ထို့ပြင် တစ်ဖက်တွင်လည်း ဘဏ်၏ ခေတ်မီနည်းပညာတိုးတက်ရေးနှင့် ငွေရေးကြေးရေးဆိုင်ရာ ပိုမိုဖွံ့ဖြိုးတိုးတက်ရေးအတွက် ကမ္ဘာ့ရတနာဘဏ်၏ ဆောင်ပုဒ်ဖြစ်သော “သင့်ရည်မှန်းချက် အောင်မြင်ရေး၊ GTB မှဖြည့်ဆည်းပေး” “Your Dream Your Success, Global Treasure Bank” ဆောင်ပုဒ်နှင့်အညီ ပြည်တွင်းဘဏ်လုပ်ငန်းနှင့် အပြည်ပြည်ဆိုင်ရာဘဏ်လုပ်ငန်းများတွင် ပိုမိုတိုးတက်အောင်မြင်သည့် ဘဏ်တစ်ခုအဖြစ်သို့ ရောက်ရှိရန် အလေးအနက်ယုံကြည်ပါကြောင်း ဆန္ဒပြုအပ်ပါသည်။